Nijni Novqorodda ilk dəfə olaraq “Almaz-Antey” hərbi-sənaye konserni tərəfindən hazırlanmış Rusiyanın perspektivli “E-Neva” elektromobili canlı nümayiş etdirilib. Avtomobili Rusiya Federasiyasının Sənaye və Ticarət Naziri və eyni zamanda yeni təyin olunmuş Baş nazirin müavini Denis Manturov idarə edib.

Avtomobil “Qələbənin 70-ci illiyi adına Nijni Novqorod Zavodu”nun mağazalarında  nümayiş etdirildi - o, “Almaz-Antey”in tərkibindədir. Bu, prototip deyil, sadəcə işlək maketdir. E-Neva layihəsi həm minik avtomobilləri, həm də yüngül kommersiya avtomobilləri üçün uyğun olacaq platforma olan təmiz elektrik və ya ardıcıl hibrid güc aqreqatlarını təklif edən universal modul avtomobil şassisi yaradır. Almaz-Antey-in işləri öz təşəbbüsü və öz hesabına aparılır.

E-Neva elektromobilinin necə göründüyü əvvəlcədən məlum idi, çünki avtomobilin patent şəkilləri 2021-ci ilin dekabr ayının sonunda ictimaiyyətə sızdırılmışdı, eyni zamanda şirkət bir neçə promo fotoşəkil dərc etmişdi. 2022-ci il yanvarın ortalarında internetdə rus avtomobilinin iri miqyaslı nümunəsinin olduğu video yayıldı.

Manturov tərəfindən sınaqdan keçirilmiş E-Neva elektromobili kompakt beşqapılı krossoverlər kateqoriyasına aiddir, onun ümumi uzunluğu 4,5 m-dir. Maşın 824 Nm fırlanma anı olan mühərriklərlə təchiz olunub, təxmini sürətlənmə müddəti 0-60 km/ saat üçün 2,7 saniyə, maksimal sürəti 197 km/saatdır E-Neva 15 düymlük ekran və proyeksiya displeyi olan media sistemi ilə təchiz olunub. Baqajın həcmi 610 litrdir, bir batareyanın doldurulması ilə yürüş ehtiyatı 463 km-ə qədər.

Şassi “Almaz-Antey”in tərkibinə daxil olan “Obuxov” zavodu tərəfindən, kuzovu və dizaynı Sankt-Peterburq Politexnik Universiteti tərəfindən hazırlanıb. Korpusa nisbətən qeyri-adi böyük təkər bazası diqqəti cəlb edir - bu, salonun sərnişin hissəsini mümkün qədər genişləndirib.

Obuxov zavodu bu maşını konversiya, yəni hərbi sənaye kompleksinin səlahiyyətlərindən mülki sektorun ehtiyacları üçün istifadəsinin bir hissəsi kimi inkişaf etdirməyə qərar verib.

"Almaz-Antey" Rusiyanın ən böyük müdafiə holdinqidir, onun tərkibinə 60 müəssisə daxildir, konserni hava və raket əleyhinə müdafiə üçün silahların hazırlanması və istehsalı ilə məşğuldur. Almaz-Antey-in ən məşhur məhsulları S-300, S-400 və S-500 uzun mənzilli hava hücumundan müdafiə sistemləridir. Konsern 100% dövlətə məxsusdur. “Almaz-Antey” silah istehsalçıları arasında dövriyyəyə görə dünyada 15-ci yerdədir. Holdinqin strukturuna Bryansk avtomobil zavodu da daxildir, lakin o, super ağır təkərli şassilər istehsal edir.

Tərcümə: Famil Ələkbərli

Mənbə: avtosreda.ru